Во родното село Глобочани, Општина Пустец, денекса беше одбележана 112-годишнината од раѓањето на истакнатиот писател со македонско потекло Стерјо Спасе. По тој повод, делегација на Македонската алијанса за европска интеграција (МАЕИ) положи цвеќе пред неговата биста и оддаде почит на неговиот живот и книжевно дело.
-Стерјо Спасе (1914–1989), роден во Глобочани, Општина Пустец, а починат во Тирана, е еден од значајните основоположници на современата албанска литература. Неговото творештво е длабоко поврзано со родната Преспа, македонската традиција и културното наследство на Македонците во Албанија, објави весник “Македониум”.
Спасе зад себе остави значаен книжевен опус како писател, антологичар, преведувач, автор на учебници и собирач на македонски народни умотворби.
Преку своето творештво тој претставуваше своевиден мост меѓу културите, пренесувајќи ги животот, традициите и приказните на Преспа до пошироката јавност.
-Глобочени и Преспа со право се гордеат со својот сограѓанин, кој остави траен белег во албанската книжевност и претставува значаен придонес на Македонците во културниот и општествениот живот на Албанија, вели Васил Стерјовски, претседател на партијата.
Од МАЕИ порачаа дека споменот на Стерјо Спасе и неговото дело треба да продолжат да се негуваат и пренесуваат на идните генерации.
-Неговото дело нека биде траен потсетник дека културата ги поврзува луѓето, ги надминува границите и живее и тогаш кога генерациите се менуваат. Слава и почит кон Стерјо Спасе, додава Стерјовски.
Во знак на почит под мотото „По стапките на Спасе“ во музејот, што го носи неговото име, во село Глобочони, одржана беше литературна вечер посветена на животот, делото и наследството на Стерјо Спасе.
