Засега нема информации за Македонци – туристи кои имаат потреба од помош во опожарените подрачја во Хрватска. Според хрватските медиуми, вакво нешто не се памети во поновата историја на земјата. За само два часа синоќа, големиот пожар кај Омиш голташе делови од градот и зад себе остави изгорени десетици куќи и автомобили. Повредени се речиси 40 луѓе, од кои десет се наоѓаат на интензивна нега, најголем дел се во животна опасност, а повеќе од 200 лица се евакуирани, додека противпожарните екипи со часови се бореа против стихијата која доби уште поголема моќ поради силниот ветер.
Според зборовите на заменик-градоначалникот на Омиш, Иван Пивчевиќ, штетата е огромна. Изгореле десетици возила на Јадранската магистрала, како и многу куќи и тврдината Фортица. Сообраќајот на таа делница е во прекин.
Пожарот, кој изби во Локва Рогозница кај Омиш синоќа околу 20 часот, според последните информации, пожарникарите успеале да го стават огнот под контрола.
