Од Министерството за внатрешни работи велат дека истрагата за ширењето паника во Скопје дека водата не е безбедна за пиење и во неа има бактерија ешерихија коли продолжува. На разговор во станица беа повикани 13 луѓе кои пишувале по социјалните мрежи без да имаат какви било информации од надлежни институции. Од полицијата потврдија дека никој од нив не кажал веродостоен извор кој би ги поткрепил тврдењата за загадување на водата. Сите се правдале дека претходно виделе друга објава на социјалните мрежи или слушнале од други.
Секторот за компјутерски криминал прибира докази, по што МВР ќе треба да каже дали осомничените кои ширеа лажни информации дека водата во Скопје е небезбедна ќе одговараат кривично или прекршочно. Од МВР апелираат да не се шират непроверени информации, особено за здравјето и безбедноста на граѓаните, и можат да предизвикаат неоправдана паника и вознемиреност во јавноста.
