Депонијата во Радуша денеска се чисти во голема и координирана акција, информира градоначалникот на Скопје, Орце Ѓорѓиевски. Од локацијата се отстранува површинскиот отпад, по тврдењата и реакциите во јавноста поврзани со наводна опасност за водата од изворот „Рашче“.
Ѓорѓиевски посочува дека депонијата се наоѓа на неколку десетици километри од заштитената зона на изворот „Рашче“ и, според него, не претставува основа за тврдењата дека е загрозена водата.
„Кога станува збор за здравјето, сигурноста и спокојството на граѓаните, за нас нема туѓа надлежност“, порача Ѓорѓиевски, додавајќи дека иако чистењето не е обврска на Град Скопје, градските служби се на терен.
Градоначалникот повторно уверува дека водата во Скопје е безбедна за пиење, а секојдневно се вршат детални анализи во лабораторијата на ЈП „Водовод и канализација“.
„Резултатите се јасни и нема простор за паника, шпекулации или ширење страв меѓу граѓаните“, вели Ѓорѓиевски.
Во објавата тој информира и дека лицата кои во текот на вчерашниот и денешниот ден предизвикале вознемиреност и паника меѓу скопјани веќе разговараат со надлежните органи.
Видеото може да го погледнете на следниот линк:
