Мобилната единица за безбедност на сообраќајот на патиштата при Секторот за сообраќајни работи синоќа изрекла 50 санкции во акциска контрола на подрачјето на Тетово, за санкционирање на возачи на мопеди, мотоцикли и лесни електрични возила (тротинети) кои не ги почитуваат сообраќајните правила и прописи, која била спроведена во периодот од 17:00 до 23:00 часот.
Како што информираат од Министерството за внатрешни работи, од вкупниот број на санкции, девет биле изречени за возачи на лесни електрични возила (тротинети), 31 за управување мопед и мотоцикл без заштитен шлем (кацига), една за изминат рок на важност на осигурителна полиса, една за истечена важност на регистрацијата на мотоцикл, една за управување без соодветна категорија, една за управување под дејство на алкохол, една за други прекршоци сторени од возачи на мопеди и мотоцикли, три мерки за останати сообраќајни прекршоци и едно барање за правно лице.
Од МВР посочуваат дека едно лице е лишено од слобода поради постоење основи на сомнение за сторено кривично дело по член 297-а од Кривичниот законик – управување со моторно возило (мопед) без да поседува возачка дозвола, а притоа мопедот е одземен.
-Привремено одземено е и едно лесно електрично возило (тротинет), бидејќи било управувано од дете кое превезувало друго лице – велат од Министерството.
Од МВР најавуваат дека сообраќајните контроли продолжуваат и во наредниот период на територијата на цела држава, со цел санкционирање на сторителите, зголемување на безбедноста и заштита на учесниците во сообраќајот. Апелираат до сите учесници во сообраќајот да ги почитуваат сообраќајните правила и прописи, со што заеднички ќе придонесеме за побезбедни патишта.
