Македонските аеродроми продолжуваат со силен раст, а охридскиот аеродром „Св. Апостол Павле“ во јули го забележа најуспешниот месец во својата историја. Преку него поминале 52 илјади 544 патници, што е раст од 41,2 отсто во однос на лани, а реализирани се 443 летови. Во првите седум месеци од годинава опслужил 175 илјади 182 патници, односно 24,2 отсто повеќе од истиот период лани.
Позитивен тренд бележи и скопскиот аеродром, кој во јули опслужил 408 илјади 925 патници, што е зголемување од 29,5 отсто. Од јануари до јули, двата македонски аеродроми заедно опслужиле околу 2,42 милиони патници, што претставува годишен раст од 28,4 отсто. Според последниот извештај на Еј-си-ај, Македонија е лидер меѓу земјите надвор од ЕУ по раст на патничкиот авионски сообраќај во првата половина од 2026 година.
