За околу една недела ќе бидат готови анализите од контролата на цените на близу 700 основни прехранбени производи што ја спроведува Државниот пазарен инспекторат. Врз основа на резултатите, Владата ќе одлучи какви мерки ќе преземе, изјави заменик-министерот за економија и труд, Марјан Ристески. Тој очекува, со смирување на воениот конфликт, цените постепено да се намалуваат, а како еден од главните владини приоритети го посочи одржувањето на ниска инфлација до крајот на годината.
„Самите анализи ќе кажат во кои групи на производи има најголеми маржи и каде можат да се симнат цените. Каде се оправдани, каде не се оправдани, каде има економска логика, каде нема – тоа ќе ја покаже анализата. Анализата ќе биде готова за брзо време и ќе бидете известени од Министерството за економија и Владата“, изјави заменик-министерот за економија и труд, Марјан Ристески.
Ристески, заедно со заменик-директорката на Агенцијата за вработување, во Штип извршија увид во пристигнатите апликации во рамки на мерката за самовработување, чија цел е поттикнување на вработувањето и развој на претприемништвото. За оваа мерка се обезбедени 22,3 милиони евра. Во штипската подружница досега се поднесени околу 65, додека во целата држава околу 4.500 апликации. Право да аплицираат имаат млади до 29 години, повратници од странство, како и сите категории на невработени лица.
„Очекуваме и овие два дена кои преостануваат од огласот, невработените лица кои имаат сопствени бизнис идеи и сакаат да отпочнат сопствен бизнис да ја искористат можноста и да се вклучат во оваа програма за самовработување“, изјави заменик-директорката на Агенцијата за вработување, Весна Пешова.
Бројот на активни баратели на работа во државата моментално се движи меѓу 40.000 и 45.000, што е околу 5 до 6% од работоспособното население. Според надлежните, ова претставува најниска стапка на невработеност забележана од осамостојувањето на Македонија.
