Министерот за економија и труд Бесар Дурмиши очекува дека 90 проценти од Реформската агенда којашто се однесува на економскиот дел ќе биде исполнета до крајот на годината. Уверува дека оној дел што се однесува за Министерството за економија ќе биде исполнет во целост.
Дурмиши денеска изјави дека кога ја презеле власта биле исполнети само еден или два чекора од Реформската агенда, а сега се исполнети пет.
– Реформската агенда е од 2019 година испорачана од Европската Комисија на нашата земја, а ние наследивме само еден или два чекори исполнети, а во Министерството за економија имаме 20-тина чекори што треба да се реализираат. На крајот на 2025 година исполнивме два чекора, сега на 30 јуни ќе исполниме околу пет чекори, а до крајот на годината очекувам сè да биде завршено или исполнето од Реформската агенда, рече Дурмиши на прес-конференцијата на која даде отчет за двегодишниот мандат.
Очекува она што зависи од Министерството за економија да биде во целост исполнето, но вели има и работи чија реализација не зависи само од Министерството.
– Сите чекори што се однесуваат на Министерството за економија и труд, ќе ги исполниме, но, има чекори како на пример да го намалиме бројот на невработеноста, што зависат и од многу други фактори и институции. Нормално дека ќе се трудиме и ќе го направиме своето, ако не успееме, ќе кажеме кои се тие фактори или кои се тие индикатори поради кои не сме успеале да завршиме, но 90 проценти од Реформската агенда ќе биде имплементирано до крајот на оваа година, рече Дурмиши.
