Вршителката на должноста претседател на Бугарија, Илијана Јотова, ја искористи Минхенската конференција за да испрати порака дека сè додека нема промена на Уставот во Македонија, нема да има никакво придвижување кон Европската Унија. Јотова ова го изјави по средбата со претседателот на Европскиот совет, Антонио Кошта, на која нагласила дека Софија и европските институции имаат идентичен став кога станува збор за условите што Македонија треба да ги исполни на својот евроинтегративен пат.
Јотова наведе оти се надева дека до јуни, кога ќе се одржи следниот самит на ЕУ за Западен Балкан, ќе се најде решение за прашањето со Северна Македонија, доколку, како што рече, земјата сè уште сака да се приклучи на Унијата. Таа си дозволи да зборува и во име на ЕУ, нагласувајќи дека ова не било само барање на Софија, туку одамна било и политика на Унијата.
Во таа насока, Јотова рече дека постои загриженост во Софија поради информациите дека властите во Македонија се обидуваат да изнајдат алтернативен пат, односно, како што вели, да излобираат меѓу европските земји Скопје да го заобиколи првиот кластер од пристапните преговори, кој се однесува на фундаменталните вредности и во кој дел се прашањата за човековите права. Според Јотова, не постои никаква шанса Бугарија да се согласи со таква промена.
