На денешната 57. седница на Комисијата за политички систем и односи меѓу заедниците ќе се одржи јавна расправа за Предлог-законот за јавното обвинителство, со кој се предвидуваат темелни реформи во организацијата и функционирањето на обвинителскиот систем. Воедно, Собранието утре треба да се изјасни и за предлогот Ненад Савески да биде избран за нов државен јавен обвинител.
Јавната расправа следува откако Собранието ја утврди потребата од донесување на законот, со што тој ја помина првата фаза од собраниската процедура.
Предлог-законот предвидува модернизација на постојната законска рамка, воведување јасен мерит-систем за избор, унапредување и оценување на обвинителите, како и зајакнување на гаранциите за нивната самостојност.
Меѓу клучните новини се поефикасен систем за оценување, прецизирани критериуми за професионалност, подобрено управување со предметите и подетализирана дисциплинска постапка со јасни рокови и механизми за спречување злоупотреби.
Законот ги зголемува и стандардите за транспарентност при изборот на јавниот обвинител, преку јавни седници на Советот на јавни обвинители, јавно презентирање на програмите на кандидатите и објавување на нивните биографии.
Министерот за правда Игор Филков изјави дека со ова законско решение се отстрануваат долгогодишни слабости во системот, како недоволна отчетност, нејасни критериуми за унапредување и бавни истражни постапки.
– Зошто беше потребна оваа реформа? Затоа што со години се наталожуваа слабости, недоволна отчетност, нејасни критериуми за унапредување, недоверба во дисциплинските механизми, бавни истраги и сомнежи на влијање. Во процесот на изготвување на законот беа оддржани дебати со поддршка на ЕУ, консултации со стручната и општата јавност преку ЕНЕР платформата, како и усогласување со мислењата на сите релевантни институции – рече министерот.
Тој посочи дека во подготовката на законот биле вклучени препораките од ГРЕКО, Венецијанската комисија, Европската комисија, како и насоките од Реформската агенда и Патоказот за владеење на правото. Според него, донесување на овој предлог закон е од круцијално значење за исполнување на два чекори од реформската агенда во областа на владење на правото.
– Со новиот закон воведуваме јасен мерит систем за избор, унапредување и оценување на обвинителите. Предлог законот воведува поефикасен систем на оценување, при што редовното оценување ќе се врши на секој три години на место досегашните четири. Значајна новина и зајакнувањето на транспарентност во постапката за избор на јавниот обвинител на Македонија се воведува појасна, пообјективна и поефикасна дисциплинска постапка – нагласи тој.
