Директорот на Бирото за јавна безбедност, Александар Јанев и неговиот албански колега, Скендер Хита, денеска во Пешкипеја разговарале за понатамошното продлабочување на полициската соработка.
-Посебен акцент ставивме на заедничкото присуство на македонски полициски службеници во Албанија за време на летната туристичка сезона, како и на координираното дејствување во борбата против прекуграничниот и организираниот криминал, откривањето криминални мрежи и идентификацијата и лоцирањето на лица кои се бегалци од правдата, објави Јанев.
Двајцата соговорници оцениле дека “безбедноста денеска се гради преку доверба, партнерство и заедничка одговорност”.
-Затоа продолжуваме посветено да инвестираме во современи решенија, силна регионална соработка и институции кои ќе испорачуваат сигурност, стабилност и подобар квалитет на живот за македонските и албанските граѓани, наведува Јанев.
Полициската статистика презентирана од албанското министерство за внатрешни работи потврдува дека само во текот на првите пет месеци од оваа година, преку граничниот премин “Блато”, минале 693 илјади граѓани и околу 290 илјади возила.
Според Хита просечниот дневен проток е околу 4.600 патници, што одразува континуирано зголемување на прекуграничното движење.
Средбата е реализирана во рамки на денешниот престој на високата делегација на МВР, предводена од министерот Панче Тошковски, кој со неговиот албански колега Бесфор Ламалари го потпишаа договорот за воспоставување заеднички гранични премини и спроведување заеднички гранични контроли меѓу двете држави.
