Соња Стамбовска од Крпош која сама се грижи за својата 94 годишна мајка Јела, која боледува од Алцхајмер и има повеќе хронични заболувања води битка со брзата помош. Тврди дека во моменти кога лекарската екипа и била најпотребна не и помогнала. Дури како што раскажува пред камерата на Алфа, била ставена и на црната листа на брзата помош. Неколку пати се нашла во ситуација да ги повика, но последниот пат како што раскажува одбиле да и помогнат и не ја знае причината за тоа.
- „Мајка ми тотално се изгуби и беше мртовец. Што да и правиш во таа ситуација? Се јавувам, напрајте вака, напрајте онака, не можеме да дојдеме. Јас бев потресена и плачев. Викам, не е работата да и помогнам јас. Треба медицинска помош, мајка ми можеби е умрена. Дојдете да установите смрт. Они ми рекоа, мајка ти е стара и имате забрана вие за Брза помош, бидејќи често сум ги барала. А зошто ги барам често. Јас живеам сама.“ – Раскажува Стамбовска.
Но, ова не било прв пат брзата помош да одбие да и помогне. Стамбоска револтирано раскажува како неколку дена пред оваа ситуација, лекарските екипи кои интервенирале рано наутро, запишале извештај дека треба да дојдат повторно. Но морала и тогаш да ѕвони, за да ги потсети што стои во извештајот. И со часови чекала да пристигнат. Но и откако пристигнале, одбиле да и укажат лекарска помош на нејзината мајка.
- „Ме виде мене во пижами, ми рече, „а вие сте легнале“. Младите докторчиња веќе влегоа во станот. Им рече да излезат. Им објаснив како веќе била Брза помош и како во извештајот запишале да дојдат повторно. Он не сакаше да слуша, ги внесе во лифтот и мене ми рече „марш таму“. – Вели Стамбовска.
Алфа се обрати до службата за Брза помош, во обид да добие објаснување што се случува и зошто постои црна листа за повици. Одговор не добивме, најавија дека по продолжението викенд ќе споделеле информација.
Во меѓувреме, Стамбовска мора да бара брза помош од приватните клиники и да плаќа по 3000 денари, па вели оти и е нејасно, зошто целиот свој живот таа и нејзината мајка плаќале здравствени придонеси кон државата, ако сега не можат да очекуваат помош од инстутциите ниту во момемнти кога станува збор за живот или смрт.
Никола Цветкоски
