Собраниската комисија за економски прашања, труд и енергетска политика на денешната седница ги прифати и го проследи на натамошна постапка Предлог-законот за изменување и дополнување на Законот за испитување и жигосување, односно обележување на огненото оружје и муницијата и Предлог на законот за јавни претпријатија и трговски друштва во сопственост или со учество на Македонија, и двата по скратена постапка.
Со предложените измени на Законот за испитување и жигосување, односно обележување на огненото оружје и муниција, според заменик министерот за економија и труд Марјан Ристески, се врши усогласување со Законот за организација и работа на органите на државната управа и е од техничка природа.
Во однос на Предлог на законот за јавни претпријатија и трговски друштва во сопственост или со учество на Македонија, беа прифатени четири амандамни од техничка карактер.
Заменик министерот Ристески појасни дека управувањето со јавните претпријатија, трговските друштва во државна сопственост се одвива во рамки на поставената правна и институционална структура, која се карактеризира со повеќе надлежни институции и различни законски решенија.
– Притоа, не е воспоставен целосен интегриран пристап во вршењето на сопственичките функции на државата, ниту пак постои јасно разграничување на улогата во управувањето што влијае врз координацијата, транспарентноста и ефикасноста во работењето на овие субјекти. Дополнително, управувањето и следењето на работата на претпријатијата не се во целост унифицирани, а достапноста на податоци и информации за нивното работење е ограничена. Од овие причини се укажува потреба од понатамошно уредување на правната рамка со цел да се обезбеди поефикасно, транспарентно, отчетно управување со претпријатијата во државна сопственост и што ќе биде содржина на овој закон, додаде Ристески.
