Центарот за стратегиски истражувања „Ксенте Богоев“ при Македонската академија на науките и уметностите (МАНУ), во партнерство со Програмата за развој на Обединетите нации (УНДП) и со поддршка на Австриската агенција за развој (АДА), денеска во Охрид ќе ја отвори „Охридската летна школа на природно право“, посветена на унапредување на знаењето и професионалните капацитети во областа на бесплатната правна помош и пристапот до правда.
Свеченото отворање ќе се одржи во „Куќата на Уранија“ со почеток во 10 часот.
На настанот најавени се воведни обраќања на заменик-министерот за правда Ален Деребан, академик Владо Камбовски од Центарот за стратегиски истражувања при МАНУ, заменичката на постојаниот претставник на УНДП во земјава Ана Чернишова и Давид Мукенхуберт, раководител на Регионалната канцеларија за техничка соработка на Австриската амбасада.
Организаторите информираат дека школата има за цел да придонесе кон зајакнување на знаењата и вештините поврзани со системот на бесплатна правна помош, како и со клучните механизми за обезбедување еднаков пристап до правда, особено за ранливите категории граѓани.
Иницијативата се реализира во рамки на регионалниот проект „EQUALS“, насочен кон реформирање и унапредување на системот за бесплатна правна помош во согласност со стандардите на Европската Унија и меѓународното право за човекови права.
