Најавата на лидерот на опозицијата дека СДСМ нема да ги поддржи измените на Изборниот законик, од владејачката ВМРО-ДПМНЕ ја оценуваат како доказ дека неговата главна цел е да се спротистави на законите од Реформската агенда и како алиби за поразот што оваа партија би го имала на следните избори.
– Филипче преку најавата за блокада бара можно алиби за следниот изборен пораз или евентуално за бојкотирање на следните избори без разлика кога ќе се случат. Многу симптоматично е дали Филипче ја следи Левица во нивните ставови бидејќи денеска имавме најава од Левица за можна блокада, а потоа следува потврдата од Филипче кој се обидува да го копира Димитар Апасиев. Дали ова е случајно или координирано останува да одговори претседателот на СДСМ, рече Антонијо Милошоски, член на Извршниот комитет на ВМРО-ДПМНЕ.
На прес-конференција во Собранието, Милошоски посочи дека Изборниот законик предвидува и електронско гласање на дијаспората што е направено според моделите на Франција и Естонија и дека со бојкотот што го најавува Филипче и прави штета на државата.
– Ваквото електронско гласење на дијаспората цениме дека е многу важно и за нивното учество со гласање за претседател на државата и за пратеници, но предавничкиот однос на Венко Филипче, за жал, не се гледа само по неговиот однос кон граѓаните, туку и со неговиот пристап кон нашите граѓани кои живеат надвор од државата. Многу е непромислено што со ваквите потези краткорочно за себе наоѓа алиби, но долгорочно и прави штета на Македонија во однос на Реформската агенда и по однос на нераскинливата врска на македонските иселеници со матичната држава преку можноста тие да гласаат на секои избори, рече Милошоски.
Смета дека не се брза со носењето на Изборниот законик затоа што, како што вели, за него се разговарало четири месеци од март.
– Од лидерската средба во јануари до март кога почнаа состаноците на работните групи во Министерството за правда каде одржавме околу 20 работни состаноци на кои немаше никакво надгласување, никаква мајоризација, одлучувавме со највисок можен степен на консензус и стигнавме до исполнување на отпрлика 28 од препораките на ОБСЕ/ОДХР по однос а Изборниот законик, рече Милошоски.
