Поголемо учество на жените во раководствата на месните заедници и организирање демократски избори за нивните органи беа главните пораки од јавната трибина што се одржа во Куманово во организација на хуманитарното здружение „Мајка“. На трибината, организирана во рамки на годишната програма за работа на здружението, се разговараше за улогата на месните заедници како механизам за учество на граѓаните во локалното одлучување, како и за можностите за поголема застапеност на жените во нивните раководни тела.
-Сакаме да отвориме дебата за тоа колку жените се вклучени во раководствата на месните заедници, дали се кандидираат на изборите и дали жените ги поддржуваат жените. Жените имаат поинакви потреби и нивното учество ќе придонесе за подобро препознавање на проблемите во локалните заедници – рече Лидија Илиевска од здружението „Мајка“.
Од здружението информираа дека од почетокот на изборите за нови раководства на месните заедници во Куманово, во раководството е избрана само една жена, во селото Романовце, и сметаат дека на наредните избори ќе има повеќе кандидатки и избрани претседателки. Во рамки на проектот, кој ќе трае до 2027 година, се работи на мобилизација на жените преку неформални женски групи и нивно обучување за јавно застапување пред локалната самоуправа и јавните претпријатија.
На трибината говореа и жени од руралните средини, кои посочија дека нивните населени места се соочуваат со проблеми како недостиг на јавен превоз, канализација, уредување на патиштата, јавната хигиена и гробиштата. Тие ги повикаа жените поактивно да се кандидираат и да се вклучат во работата на месните заедници.
Од Општина Куманово информираа дека на нејзината територија има 68 месни самоуправи, од кои 16 се урбани, а 52 рурални.
-Во моментов активни се 34 месни заедници, додека кај останатите мандатот е истечен или сè уште не е избрано ново раководство – кажа Муарем Шакировски од општина Куманово.
Според податоците на Општината, во моментов само три жени се претседателки на месни заедници, а уште 11 се членки на советите. Од локалната самоуправа очекуваат овој број да се зголеми со спроведувањето на новите избори за месните заедници.
