Гасоводниот интерконектор кон Грција влегува во значително поинтензивна фаза на реализација. По интензивната координација меѓу Министерството за енергетика, рударство и минерални суровини (МЕРМС), НОМАГАС и грчкиот оператор ДЕСФА, динамиката на изградбата е засилена, а проектот веќе бележи видлив напредок на терен.
Тоа го соопшти денеска прес-службата на МЕРСМ, од каде што пренесуваат дека ресорната министерка Сања Божиновска и претставници на грчкиот оператор ДЕСФА и НОМАГАС извршиле увид во градежните активности на трасата на гасоводниот интерконектор со Грција, при што биле информирани од изведувачот за текот на проектот, како и дека се создадени услови за значително забрзување на изградбата.
– Во моментот завршени се 95 проценти од експропријацијата, расчистени се речиси 85 проценти на трасата, а завршено е и производството на сите цевки предвидени за проектот. Досега се испорачани цевки во должина од 34 километри, од кои 21 километар се веќе распоредени по должината на трасата. Извршено е заварување на 13,7 километри цевковод, реализирани се повеќе од 800 успешни заварувања, а над 6.300 метри цевка се веќе положени во земјата. Паралелно, завршени се шест од седумте планирани премини под патишта, а обезбедени се и речиси 65 проценти од придружните објекти – блок-станиците – соопшти МЕРМС.
Како што укажуваат, изведувачот е дополнително технички доопремен со автоматски машини за заварување, што ќе овозможи значително забрзување на работите и исполнување на предвидената динамика.
Теренската посета следува по работните состаноци што Министерството ги одржа со извршниот директор на НОМАГАС, Недим Рама, и главната извршна директорка на ДЕСФА, Марија Сферуца, и тимот на ДЕСФА, на кои беше потврдена заедничката определба за интензивна координација и реализација на проектот во согласност со утврдените рокови. Истовремено,. беше потврдена и заедничката оценка дека интерконекторот ќе биде завршен во текот на наредната година.
– Овој проект претставува инвестиција во енергетската безбедност, економската стабилност и идниот развој на државата. Наш приоритет е проектот да се реализира квалитетно, навремено и со максимална динамика. Процесот е забрзан и сите институции работат координирано за успешно завршување на оваа стратешка инвестиција – истакнала министерката Божиновска.
Гасоводниот интерконектор со Грција е еден од најзначајните енергетски инфраструктурни проекти. Со неговата изградба државата ќе обезбеди нов влез за природен гас, пристап до повеќе извори на снабдување, поголема диверзификација и повисоко ниво на енергетска сигурност, како и посилно поврзување со регионалната и европската енергетска инфраструктура.
