Во Берово денеска се одржа Регионалниот форум на Источниот плански регион за одржлив третман на биоотпадот, на кој учествуваа градоначалници, претставници на јавни комунални претпријатија, институции, стопански комори, земјоделски и шумарски субјекти, граѓански организации и експерти.
Форумот се реализираше во рамки на проектот „Нула биоотпад: Системски промени во партнерство со граѓаните“, поддржан од Владата на Швајцарија преку програмата „Цивика мобилитас“, а го спроведува Здружението за еколошко одржлив развој „Зелен институт“ во партнерство со Националното здружение на сопственици на приватни шуми.
Главна цел на форумот беше да се презентираат резултатите од базичното истражување за управувањето со биоотпадот во Источниот плански регион и преку заедничка дискусија да се дефинираат најсоодветните решенија за воспоставување одржлив регионален систем. Усвоените насоки ќе претставуваат основа за изработка на предфизибилити студија, која треба да им овозможи на општините полесен пристап до финансиски средства за реализација на идни проекти.
Во своето обраќање, градоначалникот на Берово, Петар Ружински, истакна дека управувањето со биоотпадот претставува една од неговите клучни заложби, нагласувајќи дека биоотпадот треба да се гледа како ресурс, а не како товар.
– Со правилно управување можеме да придонесеме за намалување на загадувањето, заштита на природните ресурси и создавање нови можности за локален економски развој. Грижата за животната средина е наша заедничка одговорност кон сегашните и идните генерации, а регионалната соработка е неопходна за воспоставување ефикасен и одржлив систем – рече Ружински.
На форумот беше презентирана експертска студија за состојбата со биоотпадот во Источниот плански регион. Според анализите, регионот располага со значителен потенцијал за искористување на биоотпадот, особено дрвната маса, која претставува најголем дел од биоотпадот поради големите шумски површини.
Беше посочено дека дел од дозволената дрвна маса останува неискористена во шумите, што претставува економска загуба, но и дополнителен ризик од појава и ширење на шумски пожари. Експертите оценија дека искористувањето на биоотпадот може истовремено да придонесе за намалување на еколошките ризици и за создавање нови можности за производство на енергија и локален економски развој.
Учесниците се согласија дека воспоставувањето регионален систем за управување со биоотпадот претставува значаен чекор кон примена на принципите на кружната економија и создавање почиста и поодржлива животна средина. Во рамки на процесот ќе следуваат дополнителни експертски активности и подготовка на препораки за унапредување на системот за управување со биоотпадот во Источниот плански регион.
