Безбедна за пиење е водата на скопската територија, според денешните анализи на Јавното претпријатие „Водовод и канализација“ – Скопје.
Од јавното претпријатие попладнево информираа за дневните мониторинг – активности за испитување на квалитетот и безбедноста на водата за пиење.
– Во текот на денешниот ден од страна на секторот Санитарна контрола при ЈП „Водовод и канализација“ – Скопје, земени се 44 примероци од водоводната мрежа на град Скопје од кои два примероци се сирова вода од каптажите на изворот Рашче и еден примерок од бунарски потег Лепенец – соопштија од јавното претпријатие.
Оттаму потсетија дека на сите примероци им се изработува физичко-хемиска и микробиолошка анализа согласно Правилникот за барања за безбедност и квалитет на водата за пиење во акредитираните лаборатории при секторот Санитарна контрола. Согласно добиените резултати од испитувањата, сите примероци од водоснабдителниот систем на град Скопје одговарале на Правилникот за барања за безбедност и квалитет на водата за пиење.
