Вниманието на светската јавност е насочено кон Исламабад, Пакистан, каде денеска започнуваат преговорите меѓу САД и Иран, од чиј исход ќе зависи иднината на Блискиот Исток.
Американската делегација ја предводи потпретседателот Џеј Ди Венс, заедно со специјалниот претставник Стив Виткоф и Џаред Кушнер. Иранската делегација во Исламабад брои 71 член, а ја предводат претседателот на парламентот Мохамед Бакер Калибаф и министерот за надворешни работи Абас Арагчи.
Уште пред почетокот на средбата, Доналд Трамп се закани дека САД се подготвени за нови напади доколку преговорите не доведат до конечен договор.
„Сè започнуваме од почеток. Ги полниме бродовите со најдобрата муниција и со најмоќното оружје некогаш направено. Ако нема договор, ќе го употребиме многу ефикасно“, изјави Трамп.
Техеран, пак, не очекува значителен напредок од разговорите.
„Имаме добри намери, но не веруваме. Нашето искуство во преговорите со Американците отсекогаш било обележано со неуспеси и прекршени ветувања“, изјави Абас Арагчи, министер за надворешни работи на Иран.
И покрај ваквите пораки од двете страни дека нема да има поместување на позициите, аналитичарите сметаат дека ситуацијата е поинаква и дека и Техеран, а особено Вашингтон, имаат интерес од деескалација на конфликтот.
Во меѓувреме, израелската армија продолжува со нападите врз Либан. Иако следната недела Израел и Либан треба да започнат официјални мировни преговори, Хезболах порача дека ќе продолжи со борбите, додека израелските власти отфрлаат какво било враќање на претходната состојба додека трае конфликтот.
