Општина Делчево започнува нов пристап во развојот на туризмот со иницијатива за формирање Совет за туризам, со цел унапредување на координацијата и создавање услови за посистемски развој на оваа значајна гранка.
Како што информираше градоначалникот Иван Гоцевски, веќе е одржана иницијативна средба со претставници од туристичкиот и бизнис секторот, на која се разговарало за идното функционирање на советот, неговата улога и конкретните активности што треба да следат.
-Целта е да создадеме платформа за заедничка работа, размена на идеи и поврзување на општината со хотелиерите, угостителите, туристичките водичи и агенциите. Само преку партнерство можеме да постигнеме вистински резултати- истакна Гоцевски.
Тој нагласи дека за првпат туризмот во Делчево се третира на највисоко ниво, со јасна стратегија за искористување на локалните потенцијали и креирање нови можности за економски развој.
Од Општината посочуваат дека ќе бидат отворени за идеи и предлози од сите засегнати страни, при што особено се потенцира значењето на активното учество на бизнис секторот.
Формирањето на Советот за туризам се очекува да придонесе за подобра промоција на Делчево и негово позиционирање како препознатлива туристичка дестинација, како на домашно, така и на меѓународно ниво.
