Топлотните бранови не носат само физичка исцрпеност, туку оставаат сериозни последици и врз менталното здравје. Високите температури ги зголемуваат анксиозноста и стресот, а ја намалуваат и концентрацијата. Недостатокот на фокус носи ризици, а во сезона на летни одмори кога фреквенцијата на патниот сообраќај е значително зголемена, расте и опасноста од сообраќајни незгоди.
„Кога ноќите се топли и телото не навлегува во длабок квалитетен сон, такви неколку не проспиени ноќи прават кај луѓето една психичка раздлазливост, вознемиреност, се намалува концентрацијата и затоа во овој период имаме навистина зголемен број на сообраќајни незгоди, незгоди со тротинети, со мотори и велосипеди.“, изјави д-р Елена Карева Пиловска, итна медицинска помош Скопје.
Граѓаните често прават грешки кои дополнително го оптоваруваат организмот. Недоволното внесување на течности, консумирањето алкохол, тешка и мрсна храна, како и долгото изложување на сонце, можат да доведат до дехидратација, топлотна исцрпеност и сериозни здравствени компликации. Во вакви услови, лекарите советуваат лесна и свежа храна, многу вода, избегнување на кофеин и алкохол, престој во разладени простории и ограничување на физичката активност во периодот кога температурите се највисоки.
„Нормална телесна температура на човекот е од 36,5 до 37,1 или 2 степени. Кога надворешната температура се наближува кон тоа или го надминува, дава дополнителен товар при ладењето. Ако на тоа додадеме дехидратација и физички напор, тогаш навистина може да настане топлотен удар или колапсна состојба.“, изјави д-р Елена Карева Пиловска, итна медицинска помош Скопје.
Советите на лекарите ќе бидат драгоцени во наредните денови кога во Македонија се очекува повторно зголемување на температурите до 39 степени. Колку е опасно сонцето, покажува и бројот на дополнителните смртни случаи, во екстремно топлиот јуни што ја зафати Европа – 12.000 граѓани, најмногу во Франција, починаа за време на силниот топлотен бран.
