Претседателот на Собранието, Африм Гаши, денеска оствари средба со украинската амбасадорка во земјава, Лариса Дир. На средбата беше потврдена традиционално добрата и пријателска соработка меѓу двете држави и подготвеноста за нејзино понатамошно продлабочување. Разговорот беше посветен на состојбата во Украина, парламентарната соработка и можностите за натамошно зајакнување на билатералните односи, информираат од собраниската прес-служба.
Гаши ја потврдил цврстата и принципиелна поддршка на земјава за Украина, нејзината независност, суверенитет и територијален интегритет, нагласувајќи дека земјата продолжува да обезбедува политичка, хуманитарна, воена и техничка поддршка за Украина во координација со Европската Унија и евроатлантските партнери.
Тој изразил задоволство од плодната соработка меѓу Собранието и Врховната рада, истакнувајќи дека во изминатите години значително е унапредена соработката како на билатерален, така и на мултилатерален план, вклучително и на највисоко парламентарно ниво.
Во разговорот била нагласена активната улога на Собранието во Парламентарната димензија на Меѓународната Кримска платформа, при што било истакнато дека Собранието беше првиот парламент што формираше Парламентарна група за Кримската платформа, која е повторно конституирана и во актуелниот парламентарен состав.
Амбасадорката Лариса Дир се заблагодарила за континуираната поддршка што Македонија ѝ ја дава на Украина и ја поздрави активната улога на Собранието во јакнењето на меѓупарламентарната соработка и поддршката на иницијативите насочени кон воспоставување мир, безбедност и почитување на меѓународното право. Двајцата соговорници изразиле уверување дека успешната соработка меѓу двете земји ќе продолжи да се развива и во наредниот период.
