Млади уметници музичари полиглоти синоќа во Битола со целовечерен концерт го завршија музичкиот камп „Етно Македонија“ на кој годинава имаше учесници од девет европски држави.
На „БитФест“ и „Илинденски денови“ создадовме аранжмани за песни на многу јазици, со различни ритмови и со уште повеќе приказни, истакна Верица Ајтовска, координаторка на проектот „Етно Македонија“.
– Пред девет дена не знаевме кој каква песна ќе донесе, не знаевме како ќе звучат тие заеднички песни, а повеќето од нас воопшто не се познававме. Одржувавме работилници од утро до вечер, некој учеше нов музички ритам, некој се обидуваше правилно да изговори збор на дански, шведски или македонски. Секој даде свое парче, своја идеја, ритам, хармонија, глас за уникатна композиција. И, што е најважно, не сите учесници се професионални музичари, некои студираат музика, некои математика, но сите ги обединува истата љубопитност, желбата да создаваат пријателства. Токму тоа е Етно, да се запознаеш со една култура преку нејзината музика, но уште повеќе преку луѓето, рече Ајтовска по завршувањето на синоќешниот концерт во Битола, кој се одржа под менторство на уметниците Ангел Спироски од Македонија и Џули Грејн од Данска.
Младите уметници од Србија, Босна и Херцеговина, Данска, Холандија, Турција, Белгија, Португалија, Шведска и Шпанија, на „БитФест“, а во рамки на проектот „Културен Хорологион“ на Музичка младина на Македонија, беа запознати со културно историски знаменитости во Битола, локална понуда за културен туризам.
