Силниот ветер и дожд што ја зафатија Општина Старо Нагоричане предизвикаа материјални штети, прекин на електричната енергија и проблеми со водоснабдувањето во повеќе населени места. Пријавени се оштетувања на повеќе објекти, а најголем проблем претставуваат паднатите дрвја кои го отежнуваат движењето на населението и сообраќајот на локалните патишта.
– Најголемиот проблем по невремето се паднатите дрвја и оштетената електродистрибутивна мрежа. Нашите служби веднаш излегоа на терен и заедно со ЈКП „Козјак“ и Територијалната противпожарна единица работат на расчистување на сите критични локации за граѓаните безбедно да можат да се движат- изјави градоначалникот на Општина Старо Нагоричане, Мирослав Славковски.
Невремето урна и голем број електрични столбови, поради што поголем дел од општината остана без електрична енергија. Поради прекинот на напојувањето не работат ниту пумпните станици за вода, што предизвика прекин и намален притисок во водоснабдувањето во повеќе населени места.
Екипите на ЈКП „Козјак“, Територијалната противпожарна единица и надлежните служби континуирано интервенираат на сите локации каде што се пријавени последици од невремето.
– Очекуваме во текот на денот да се нормализира снабдувањето со електрична енергија до пумпните станици, по што постепено ќе се воспостави и редовното водоснабдување. Апелираме до граѓаните за трпение и разбирање додека траат активностите за целосно санирање на последиците од невремето- рече Славковски.
Од Општина Старо Нагоричане информираат дека остануваат на терен сè до целосно расчистување на последиците и нормализирање на состојбата во сите населени места.
