Нефункционални информатички системи, недостиг на ИТ кадар, доцнење во одлучувањето за лекување во странство и милионски побарувања без соодветна контрола – ова се дел од сериозните слабости што ги откри Државниот завод за ревизија во работењето на Фондот за здравствено осигурување во 2024 година.
Според ревизорите, постапките за лекување во странство сè уште се водат на хартија, а ФЗОМ нема целосен увид во авансно исплатените средства, при што побарувањата од странски болници достигнале 4,8 милиони евра.
Извештајот открива и дека Министерството за здравство до крајот на 2024 година не уплатило околу 35 милиони евра за придонеси за неосигурени лица, што дополнително ја нарушува ликвидноста на Фондот.
Ревизорите предупредуваат дека голем дел од овие проблеми се повторуваат со години, и покрај нивните препораки.
