Кумановската полиција поднесе кривична пријава против осумнаесетгодишна девојка од липковското село Лојане и против две малолетнички кои се сомничат дека сториле кривично дело „насилство“, соопшти денеска МВР.
Пријавените навредувале и физички нападнале девојче, снимале и ѝ се заканиле да не пријавува.
– СВР Куманово поднесе кривична пријава против П.А. (18) од село Лојане, општина Липково, како и против две малолетнички на возраст од 14 и 15 години од Куманово, поради постоење основи на сомнение дека сториле кривично дело „насилство“ по член 386 став 3 од Кривичниот законик-наведуваат од МВР.
Пријавените на 13-ти март, годинава околу 18:00 часот, повикале 14-годишно девојче да излезе од нејзиниот дом, по што ја убедиле да влезе во просторија во близина на спортскиот центар „Соколана“ во Куманово. Таму најпрвин ја навредувале, а потоа и физички ја нападнале, при што целиот настан го снимале со мобилен телефон.
По извршеното насилство, осомничените ѝ се заканиле на малолетничката да не го пријавува настанот и да не зборува за снименото видео, оти во спротивно ќе ѝ се случи нешто уште полошо.
