Патот на Србија кон Европската Унија се соочува со нов застој. На состанокот на амбасадорите на земјите членки во Брисел не беше постигната согласност за отворање на Кластерот 3 од пристапните преговори, откако осум држави се спротивставија на продолжување на процесот.
Според дипломатски извори, Холандија, Шведска, Финска, Белгија, Естонија, Литванија, Бугарија и Хрватска сметаат дека Србија сè уште нема доволен напредок, особено во владеењето на правото и усогласувањето со надворешната политика на Унијата, вклучително и санкциите кон Русија.
Иако Европската комисија оцени дека Белград исполнил дел од преземените обврски и препорача отворање на новиот кластер, за таква одлука е потребна едногласна поддршка од сите 27 земји членки. Дел од државите, меѓу кои и Франција, предупредуваат дека натамошното одложување би можело дополнително да ја оддалечи Србија од европскиот пат.
