По обилните врнежи од дожд што попладнево го зафатија Куманово, екипите на јавните претпријатија и фирмите изведувачи се на терен и работат на расчистување на наносите, чистење на шахтите и каналетите, информираше градоначалникот Максим Димитриевски. Во известувањето се наведува дека веднаш по намалувањето на интензитетот на дождот започнало расчистување на чакалот и песокот од улиците, а по завршување на овие активности ќе следува темелно чистење на сообраќајниците и санирање на погодените градилишта.
Куманово попладнево беше зафатено од обилни врнежи од дожд кој во одреден период беше проследен со грмежи. Од Општина Куманово ги повикаа граѓаните чии домови се поплавени да се обратат за помош при испумпување на водата на телефонскиот број 193 на Територијалната противпожарна единица Куманово.
Општината соопшти дека внимателно ја следи состојбата и останува на располагање на граѓаните. На локациите каде што дошло до излевање на фекална канализација, вечерва ЈП „Чистота и зеленило“ ќе спроведе миење на улиците и нивна дезинфекција. Кумановци укажуваат дека со години се јавуваат исти проблеми на неколку локации во градот, при обилни врнежи, особено онаму каде што има недостаток на атмосферска канализација.
