Самостојната изложба „Дијаграми на отелотворување“ на уметникот Иванчо Талевски ќе биде отворена вечер во Куќата на Робевци (НУ Завод и Музеј – Охрид). Ова е прва самостојна изложба на авторот во Охрид.
Почнувајќи од 2015 година, за време на честите патувања на релација Битола – Филаделфија, авторот Иванчо Талевски преку своите цртежи ги бележи времето и просторот, реагирајќи на различни искуства, општествени процеси, феномени, случки и локации. Создавањето на овие дела започна како начин на осознавање и истражување на овие две средини, откривајќи неочекувани точки на вкрстување. Овој процес генерира еден вид меѓупростор кој обединува наизглед неспојливи елементи, идеи, настани и идентитети.
Цртежите ги следат одгласите и реверберациите во физичката средина. Нивната постапка е блиска до хаику поетиката: неримувана и фрагментарна, со силен нагласок на моментот и просторот. Овој творечки чин резултира со колекција од фрагменти кои се мобилизираат преку рефлексивни практики, соработки и генеративни хипотези. Цртежот овде се наметнува како најсоодветен медиум за доловување на непосредните траги од трајниот сооднос меѓу телото и тлото, меѓу различните географски точки и јазици.
Цртежите во овој проект произлегуваат од секојдневните прошетки низ двата града и укажуваат на актуелни настани кои бараат преиспитување и рекалибрација на минатото, но и замислување на потенцијалните иднини.
Иванчо Талевски (1983) е мултидисциплинарен ликовен уметник и професор кој живее и работи на релација Битола – Филаделфија, САД. Во своето творештво користи стратегии на цртеж, графика, сликарство, звук и инсталации за да отвори прашања поврзани со социјалните и политичките состојби, фокусирајќи се на теми како што се индивидуалната и колективната меморија, припадноста, носталгијата, историјата и границите, како и нивното опстојување и бришење.
