Патнички автомобил „Пасат“ со скопски регистарски ознаки ноќеска целосно изгоре во скопската населба Тафталиџе, при што пожарот оштети уште две возила и деловен објект.
Според неофицијални информации, автомобилот бил поврзан со судијата Ѓоко Ристов, кој е обвинет за случајот со соѕидани 350 илјади евра во семејната куќа во Неготино.
Фотографиите од местото на настанот покажуваат дека возилото е речиси целосно уништено од огнената стихија, а најголема штета е причинета во предниот дел и моторниот простор. Од Министерството за внатрешни работи информираат дека случајот бил пријавен ноќеска околу 02:50 часот во СВР Скопје. Пожарот бил локализиран и изгаснат од екипа на Бригадата за противпожарна заштита на Град Скопје.
Од полицијата велат дека направиле увид на местото на настанот, по што треба да бидат познати и причините за избувнувањето на пожарот.
