Успешно е завршена реконструкцијата на улицата „Индустриска“ во Делчево, еден од позначајните инфраструктурни зафати во општината, со кој е обновена делница во должина од 500 метри.
Проектот е реализиран со финансиска поддршка од Владата, преку Министерството за транспорт и врски, во вкупна вредност од 11.808.566 денари.
– Со изведените активности е обезбедена поквалитетна, побезбедна и современа сообраќајна инфраструктура, која значително ќе ја подобри поврзаноста во индустриската зона, но и условите за секојдневно движење на граѓаните, информираа од Општина Делчево.
Градоначалникот на Делчево, Иван Гоцевски, истакна дека реализацијата на овој проект претставува исполнување на уште едно ветување.
– Ова е потврда дека со визија, партнерство и посветена работа се постигнуваат конкретни резултати во интерес на граѓаните, додаде Гоцевски.
Од Општината информираат дека и во наредниот период ќе продолжат со реализација на инфраструктурни проекти насочени кон модернизација на локалната патна мрежа, подобрување на квалитетот на животот и создавање подобри услови за економски развој.
