Државната комисија за спречување на корупцијата (ДКСК) на денешната седница запре постапки и отфрли повеќе предмети откако утврди дека по наводите од пријавите веќе постапувале надлежни институции или биле преземени мерки во рамки на нивните законски надлежности.
Меѓу предметите за кои Комисијата донесе одлука за запирање на постапката е анонимна пријава поврзана со исплата на додаток на плата од 15 отсто во Агенцијата за финансиска поддршка. По извршен вонреден инспекциски надзор, Државниот инспекторат за труд не утврдил неправилности во работењето на институцијата, по што ДКСК го затвори предметот.
Комисијата ја отфрли и пријавата против градоначалник на една општина која се однесувала на постапување во управна постапка за утврдување статус на бесправно изграден објект. Од приложената документација произлегло дека за случајот веќе постапуваат други надлежни органи, меѓу кои и Основното јавно обвинителство.
Меѓу запрените предмети е и анонимна пријава за работењето на правно лице што врши погребални услуги. По барање на ДКСК, Државниот пазарен инспекторат спровел вонреден инспекциски надзор при што биле констатирани прекршоци и биле преземени соодветни мерки, поради што Комисијата оценила дека нема основ за натамошно постапување.
На седницата беа разгледани и други предмети во кои Комисијата донесе одлуки за запирање на постапките или за отфрлање на пријавите, врз основа на утврдувањето дека по наводите веќе постапувале надлежни институции или биле спроведени соодветни контроли и надзори.
