Директорот на Центарот за управување со кризи (ЦУК), Мухамед Али се сретна со директорот на Општата болница „Д-р Ферид Мурад“ во Гостивар, д-р Емри Бајрами.
На средбата се разговараше за актуелната состојба во Гостивар по појавата на случаи на заразени граѓани, како и за преземените мерки, координацијата меѓу надлежните институции и понатамошните активности за ефикасно справување со состојбата по прогласувањето на кризна состојба, соопштија од ЦУК.
Директорот на ЦУК, Али ја изрази целосната поддршка на Центарот за управување со кризи кон Општата болница „Д-р Ферид Мурад“ и кон сите институции вклучени во справувањето со оваа состојба. Тој истакна дека ЦУК останува во постојана координација со надлежните институции и е подготвен да ги стави на располагање своите капацитети за навремена реакција и потребна поддршка.
Директорот на болницата, д-р Бајрами информираше за тековната состојба, активностите преземени од здравствениот персонал, третманот на пациентите и потребите за понатамошно справување со состојбата.
На крајот од средбата е потврдена заедничката определба за продолжување на тесната соработка и координација меѓу ЦУК и здравствените институции, со цел брза и ефикасна реакција, заштита на здравјето на граѓаните и успешно справување со предизвиците во Гостиварскиот регион, информираа од ЦУК.
