Директорот на Музејот на Македонија, Александар Ристевски и претседателот на македонското друштво „Преспа“ Едмонд Темелко денеска беа во посета на Македонците во Општина Пустец.
Според Темелко, реализирале „низа значајни активности меѓу нашиот народ во Мала Преспа, Република Албанија“, место каде македонскиот идентитет, јазик и традиција се чуваат со длабока љубов и непокор.
-Во Пустец во училиштето „Митре Колевски и Трајан Ѓорѓиевски“ се сретнавме со директорот Трајан Вангеловски, на кого му врачивме донација на книги за учениците. Чувањето на македонскиот јазик и пишаниот збор кај младите генерации е наша најсвета должност, објави Темелко.
Додаде дека во село Глобочани го посетиле Музејот посветен на големиот писател Стерјо Спасе — вечен потсетник за богатата македонска култура и историја на овие простори.
– Во село Туминец со длабок пиетет се поклонивме пред Споменикот на борците, оддавајќи им должна чест на сите херои кои се бореа за идеалот и слободата. Денот го заокруживме со посета на манастирот „Св. Марина“, во истото село, кој го одбележува својот патрон, и се помоливме за здравје, духовен мир, зачувување на верата и подобра иднина за сите Македонци во Албанија, наведува Темелко во објава на Фејсбук.
Посочува дека Македонците во Албанија се неизбришлив дел од историјата, сегашноста и иднината, нагласувајќи дека „заедно продолжуваме да ги градиме мостовите на културата, образованието и духовното единство – македонското име дух живеат во Мала Преспа“.
