Дебарската територијална противпожарна единица, во првото полугодие од годинава, имала повеќе интервенции, главно на отворен простор, споредно со истиот период минатата година.
-Во периодот јануари-јуни имавме 78 интервенции, што е за 10 повеќе споредено со истиот период лани. Поголемиот број од интервенциите се пожари на отворен простор или 46, на објекти се 21, на сообраќајни средства една и 10 се технички интервенции. И минатата година за овој период поголем број од пожарите се на отворен простор, изјави за МИА, Џетан Мифтароски, командир на ТППЕ.
Поради високите температури и зголемениот ризик од пожари Мифтароски упатува апел до сите граѓани да се однесуваат одговорно.
-Упатувам апел за претпазливост, до граѓаните, земјоделците, сточарите, со цел спречување на појава на пожари на отворен простор. Сите треба да бидеме свесни дека со нашето совесно однесување придонесуваме во заштитата на животна средина, имотите и заедниците во целина. Потсетувам дека во сила е целосната забрана за движење во шумите, рече Мифтароски.
Четиринаесетте пожарникари на оваа единица, интервенираат на подрачјето на општините Дебар, Центар Жупа, како и подрачјето на Река, општина Маврово и Ростуше. Од хуман аспект, а во согласност на локалните власти на двете општини, тие интервенираат и во пограничните населени места од албанскиот округ Пешкопеја, при неопходна потреба.
