Две нови електронски услуги на ДИЗ: сертификат за извоз на вино и сертификат за земјоделски производи, преработки и стоки

Уверение за квалитет – сертификат за земјоделски производи, преработки и стоки, како и уверение за квалитет В1 – сертификат за извоз на вино, се двете нови електронски услуги на Државниот инспекторат за земјоделство, наменети за компаниите што од денеска ќе бидат достапни преку Националниот портал за услуги – uslugi.gov.mk. 

Како што рекоа министерот за дигитална трансформација, Стефан Андоновски, и директорот на Инспекторатот, Ивица Ангеловски, на прес-конференција во Владата, компаниите отсега, освен во хартиена форма, ќе може да ги добиваат сертификатите и во електронска форма со иста правна важност.

Станува збор за постапки поврзани со квалитетот на земјоделските производи и извозот на вино, односно со сектори што создаваат домашна вредност, обезбедуваат работни места и ја претставуваат Македонија на најдобар можен начин на странските пазари.

– Продолжува процесот на дигитализација. На uslugi.gov.mk од денеска се достапни две нови електронски услуги на Државниот инспекторат за земјоделство. Нашата цел е јасна: јавните услуги да бидат побрзи, поедноставни и подостапни, а институциите поефикасни и поодговорни. И понатаму работиме на забрзана дигитализација на услугите што имаат материјално и непосредно значење за граѓаните и стопанството. Продолжуваме да градиме дигитална држава, која штеди време, ги намалува трошоците и создава подобри услови за работа, развој и економски напредок – потенцира министерот Андоновски.

За една компанија, нагласи, времето потребно за добивање документ не е само административно прашање.

– Тоа е дел од трошокот за работење, од брзината на производството и од нејзината конкурентност. Доколку институциите доцнат, доцни и компанијата. Доколку постапката е сложена, растат трошоците и се намалува можноста за развој и извоз. Затоа, за нас, дигиталната трансформација не претставува само воведување нова технологија, туку претставува промена на начинот на кој функционира државата и на односот што институциите го имаат кон граѓаните и компаниите. Токму затоа Националниот портал за услуги uslugi.gov.mk го развиваме како единствена точка преку која граѓаните и компаниите ќе може да пристапуваат до јавните услуги едноставно, сигурно и без непотребно губење време – истакна Андоновски.

Според него, дигитализацијата има уште една исклучително важна димензија – зголемување на транспарентноста и намалување на ризикот од корупција.

– Кога постапките се дигитални, правилата се однапред утврдени и еднакви за сите, се намалува непосредниот контакт таму каде што е непотребен, се ограничува просторот за субјективно одлучување и се создава јасна електронска трага за постапувањето на институцијата. На тој начин не се подобрува само брзината на услугата, на тој начин ги зајакнуваме одговорноста на администрацијата, правната сигурност на компаниите и довербата на граѓаните во институциите. Успешната дигитална трансформација бара соработка. Министерството за дигитална трансформација ги обезбедува заедничката инфраструктура, стандардите и поддршката, но секоја институција мора да ги препознае услугите што треба да се поедностават и да покаже подготвеност да ги подобри своите работни процеси – напомена министерот Андоновски.

Директорот Ангеловски посочи дека со новите две услуги се поедноставува целокупната постапка, се скратува времето потребно за добивање на сертификатите, се елиминира потребата од нивно лично подигнување во Инспекторатот и се намалуваат финансиските трошоци што компаниите ги имаат при користењето на овие услуги.

– Дополнително, целосно е дигитализирана и постапката за плаќање на административните такси. Наместо досегашното плаќање со хартија и уплатници, плаќањето понатаму ќе се врши електронски преку апликации за електронско банкарство, со што се овозможува побрза, поедноставна и поефикасна постапка во процесот. Со овие активности правиме уште еден значаен чекор кон современа, ефикасна и транспарентна јавна администрација, која е во служба на граѓаните и стопанството и ги следи современите дигитални стандарди – рече Ангеловски.