Со 21 стендап-претстава на седум атрактивни сцени во Охрид и Струга, од 21 јули до 13 август ќе се одржи осмото издание на фестивалот „Summer Comedy Marathon 2026“.
Фестивалот ќе биде отворен на 21 јули во Центарот за култура „Григор Прличев“ во Охрид со настапот на австралискиот стендап-комичар Амос Гил, кој живее и работи во САД, а ќе настапи со шоуто „The Pale, Stale, Straight White Male“ на англиски јазик. По програмата до 30 јули ќе следува тридневна пауза за Илинденските празници, по што фестивалот продолжува од 4 до 13 август.
Организаторите на денешната прес-конференција информираа дека годинава фестивалот ќе се одвива на досега најголем број локации – „Куба Либре“, „Џез Ин“, бродот „Армада“, винаријата „Monastery Winery“ во Опеница, „Cinema Food & Bar“ во Струга, Центарот за култура во Охрид и стадионот „Билјанини Извори“, каде што ќе се одржи завршното шоу.
Во програмата се вклучени домашни и странски стендап-комичари со тематски вечери, меѓу кои „Best of“, „Comedy Jam“, „Црн хумор“ и „Sex Show“. Организаторите најавија и „Open Mic“ вечер на 12 август, наменета за сите кои сакаат да се обидат како стендап-комичари.
Финалето на фестивалот е закажано за 13 август на стадионот „Билјанини Извори“ со шоуто „Опстанок“, со кое ќе биде одбележан и јубилејот – 15 години стендап-кариера на Никола Тодороски. На завршната вечер ќе настапат и Тино и Атанас, како и Никола Сиљаноски.
Целосната програма и информациите за билетите се достапни на веб-страницата на фестивалот.
