Управата за хидрометеоролошки работи, врз основа на податоците од националната мрежа на автоматски метеоролошки станици, регистрираше дека за време на бурата во Македонија имало ветер со брзина на ураган.
Имено, во Штип ветерот достигнал до 134 километри на час, додека во Скопје максималниот удар бил со 130 километри на час. Од 47 мерни места за ветер, олуја и олуен ветер со брзина до 88 км/час е регистриран на 12 мерни места, силна олуја со брзина до 102 км/час на 6 мерни места, додека оркан или ураган со брзина над 118 км/час е регистриран на 3 автоматски метеоролошки станици. На останатите мерни места е регистриран ветер со јачина под 62 км/час.
Оркан, односно ураган, според класификацијата за јачина на ветер, претставува ветер чија брзина надминува 118 км/час. Тоа е екстремно силен ветер кој на оваа територија се случува многу ретко и предизвикува силни разорувања и значителни штети во пошироки размери.
