Се нижат имиња на директори од владејачката гарнитура кои инкасираат огромни пари врз грбот на граѓаните. Опозициската ВМРО-ДПМНЕ ја збогати аферата „Паразити“ со уште тројца функционери кои заработуваат астрономски плати, без притоа, како што велат од партијата да испорачаат конкретни резултати од својата работа. Меѓу нив се најде првиот човек на Развојната банка на Македонија Кире Наумов, со плата од над 2.500 евра кој за четири години мандат наплатил дури 120 илјади евра.
„Кире Наумов од СДС, директор на Македонска банка за обнова и развој, е уште еден во низата функционери дел од аферата Паразити. Наумов, кој беше допопнителен заменик министер за финансии на СДС, денес месечно зема над 2.500 евра плата, за една година тој наплаќа над 30.000 евра, а за еден мандат дури 120.000 евра. Значи додека владата им зема оброк на студентите, Наумов заработува на грбот на државата 2.500 евра секој месец“ – вели Ивица Томовски ОД ВМРО-ДПМНЕ.
На листата „Паразити“ се најде и директорот на Агенцијата за електронски комуникации Јетон Акику со плата од 30 илјади евра за една година, како и финансискиот директор на Телеком Славко Пројковски со плата од 6 илјади евра месечно.
„Директорот на АЕК, Јетон Акику, зема плата од 132.000 денари, поточно над 2.000 евра месечно или за една година околу 30.000 евра. Уште еден во низата функционери со високи плати, е и Славко Пројковски, финансиски директор во Телеком, каде сопственост има и државата, е со плата од над 6.000 евра месечно. Тој, за една година зема 72.000 евра, а за еден мандат од 4 години дури 288.000 евра. Тоа е исто, како директорот на Телеком Љушев, кој за само еден месец зема 11.500 евра, тоа за една година се над 138.000 евра, додека за еден четири годишен мандат над 552.000 евра“ – вели Томовски.
Од ВМРО-ДПМНЕ наведуваат дека само за палти овие тројца функционери за еден мандат земаат еден милион евра, додека голем дел од граѓаните се на минималец, а власта реши да крати од студентите. Лидерот на партијата Христијан Мицкоски побара да се направи чистка меѓу непродуктивните кадри и нивелирање на нивните плати. Аферата која ќе продолжи и наредните денови, веќе ги опфати имињата на првите луѓе на Агенцијата за цивилно воздухопловство, ПУИК и Македонска Навигација, како и директори и функционери во Телеком и МЕПСО.
Тања Попова
