Македонија се поинтересна за странските гости. Бројот на туристи и на ноќевања се зголемил за по речиси 22% во првиот квартал од годинава споредено со истиот период лани.
Според официјална статистика годинава во март се евидентирани 70 902 туристи од кои 78 отсто се од странство, а 22 отсто домашни. Во првите три месеци од 2025 имало над 160 илјади туристи (166.764) од кои 116.809 странски туристи.
Нашата држава била најинтересна за турстите од Германија, Турција, Франција и од Грција.
Број на туристи Држава
- 10 410 Германија
- 9 380 Турција
- 4 648 Франција
- 4 504 Грција
Хотелиерите очекуваат дека годинава ќе ги надмине ланските бројки, особено радува што има туристи и вон сезона. Пуштањето на автопатот Охрид – Кичево кој треба целосно да биде завршен пред стартот на летната сезона, но и изградбата на Тетово – Гостивар се очекува да го зголеми интересот за посета на туристичките места , затоа што значително ќе се намали патувањето од Скопскиот аеродром.
Податоците од статистика покажуваат дека и за домашните и странските туристите најинтересни биле езерските места. Гостите најмногу се интересираат за природните убавини на Македонија, културата и храната
Статистика бележи намалување на бројките на домашните туристи за 9.2 отсто,а по бројот на ноќевања на македонските граѓани низ државата исто има намалување од 7.8 отсто.
Според угостителите треба да се развиваат што повеќе авио конекции , особено од Охридскиот Аеродром. Последните најави од министерството за транспорт се дека се преговара да се лета за Будимпешта од Охрид, а се размислува и за нов модел за субвенционирање на авиолинии, што треба да донесе најмалку десет нови дестинации. Во моментов вкупно од Македонија се лета кон 64 дестинации од кои 56 од скопскиот и 8 од охридскиот аеродром.
