Општина Илинден успешно ја заокружи реализацијата на значаен инфраструктурен проект во населеното место Марино – изградбата на нов плочест мост и сервисната улица „500“, со што се отвора нова и современа патна врска меѓу населените места и се создава уште една важна алка во инфраструктурната мрежа на општината.
Новиот мост е целосно изграден, со широчина од 6 метри и тротоари широки по 1,5 метри од двете страни. Асфалтираната површина и поставената заштитна ограда обезбедуваат поголема сигурност и безбедност, претворајќи го мостот во своевиден безбеден простор што ги поврзува луѓето, домовите и секојдневните потреби на граѓаните. Паралелно со изградбата на мостот, целосно е завршена и новата сервисна улица „500“, во должина од 260 метри. Улицата располага со коловоз широк 5,5 метри и тротоари со широчина од 1,5 метри од двете страни, создавајќи современа и функционална сообраќајна артерија за овој дел од Марино. И мостот и улицата се целосно асфалтирани со два слоја асфалт, а поставената сообраќајна сигнализација придонесува за поголема прегледност, ред и безбедност во сообраќајот. Долж улицата и мостот ќе биде поставено и улично осветлување.
Во рамки на проектот е изграден и систем за собирање и одведување на фекални отпадни води, односно фекална канализација за објектите што гравитираат кон оваа улица. Ова претставува значаен чекор кон унапредување на комуналната инфраструктура и создавање подобри и поздрави услови за живот, поставувајќи цврсти темели за одржлив развој на овој дел од општината.
Изградбата на мостот и сервисната улица „500“ овозможува директно поврзување со веќе изградената улица „119“ во населбата Јака. Со ова, населбата со повеќе од 330 домаќинства добива нова и поквалитетна врска со централниот дел на Општина Илинден, односно со населеното место Марино. Новата сообраќајна врска значително ќе ја олесни комуникацијата, ќе ја подобри мобилноста на граѓаните и ќе придонесе за поквалитетно секојдневие. Она што досега беше оддалечено и добива континуитет.
Вкупната вредност на реализацијата е финансирана со 60% средства од Владата на Република Македонија и 40% средства од Буџетот на Општина Илинден.
Општина Илинден и во периодот што следува останува цврсто посветена на продолжување на започнатите активности и реализација на нови развојни проекти. Целта е јасна – со инфраструктурата да се отвораат нови патишта, а со секој реализиран проект да се гради посигурна, посовремена и поквалитетна иднина за сите граѓани на општината.
