Поефикасна работа и поголеми надлежности и ингеренции. Полицијата во македонската метропола ќе стане уште поефикасна во делувањето. Законските измени кои се во собраниска процедура носдат бројни промени со цел подобра организација, ефикасност и оптималност во користењето на човечките и материјалните ресурси во рамки на МВР.
Двата предлог закони за ова го поминаа првиот филтер на Комисијата за одбрана и безбедност. Со новите законски решенија, Секторот за внатрешни работи Скопје ќе се трансформира во посебен Оддел за внатрешни работи – Скопје. Целта, според предлагачите, е појасно да се разграничат надлежностите меѓу организациските единици во МВР и прецизно да се утврди местото на секторите и на Одделот за внатрешни работи – Скопје.
Опозицијата која поднесе 12 амандмани критикува за ризик од политизација и недостаток од стручна анлиза. Проблем според нив е што законските измени се по предлог на пратеници, а не на МВР:
„Основна проблематика според мене се базира отсуство на иницијатива од страна на МВР. Зошто? Предлог законот е поднесен од група на пратеници, а не од Министерството за внатрешни работи, како надлежен орган за оваа проблематика, ова укажува дека МВР според мене, не ја препознава потребата од оваа промена. Стручните лица кои секојдневно работат на оваа проблематика во МВР, со полициските операции не го поддржуваат предлогот и не постои консензус во безбедносните структури за оправданоста на промената“, изјави Сали Мурати-Коалиција Европски фронт,
Пратеникот на ВМРО-ДПМНЕ, Ковачки, му реплицираше дека е вообичаено законите да бидат поднесени од пратеници, реагирајќи на забелешката на Мурати дека нема иницијатива од надлежното министерство, односно од МВР.
„Предлог законот е поднесен од група пратеници, а не од МВР. Па вака вие ни го оспорувате на нас правото да поднесуваме предлог измени, закони, амандмани и така натаму. По таа логика се поставува прашањето како вие сте ги поднеле вие амандманите. Не можете тоа да ни го доведете во прашање. Сте биле претседател на Уставен суд знаете како одат овие работи. Правник сте. Министерството за внатрешни работи не ја препознало потребата од оваа промена. Стручните лица кои секојдневно работат со полициските операции не го поддржувале предлогот. Од кај го знаете ова паушално е“, изјави- Драган Ковачки-ВМРО-ДПМНЕ.
Со законските измени, се воведува и нова функција – началник на Одделот, кој ќе раководи со работата и ќе ја координира полицијата на територијата на главниот град. Раководната позиција добива повисок статус во рамките на полициската структура, а се прави и терминолошко усогласување кај криминалистичко-техничките работи.. Решението се темели на претходната практика, каде раководителот на СВР имал повисок ранг, но и на фактот што Скопје има посебна територијална поставеност во однос на другите градови во државата.
