Се очекува жестока дебата на денешната седница во Собрание. Освен расправата за повеќе важни законски решенија, треба да се гласаат и шесте закони со кои ќе се замрзнат функционерските плати, односно нема да се покачат за дополнителни 15% согласно растот на просечната и минималната плата во март. Власта предизборно се додворува на граѓаните со тоа што се откажува од трошките, но си го задржа покачувањето од 78% кое беше одлука на Уставен суд. Откако сите шест закони ги поминаа комисиските филтри, пратениците ќе гласаат на пленарна седница.
На денешната седница се и четирите закони за стратешки инвестиции, овој пат предложени од Фатмир Битиќи, функционер на СДСМ, но не и од Крешник Бектеши кој е од ДУИ. Ова најверојатно наговестува некаков раскол помеѓу владејачките партии. Спорните законски измени кои власта сака да ги истурка во предизборие предизвикаа остри реакции од стручната фела која предупредува дека Македонија може да го загуби енергетскиот суверенитет со оглед на тоа што други земји ќе имаат инвестиции во енергетскиот сектор, па дури и ќе добијат помош за тоа од македонската Влада. Опозицијата исто така предупредува за можни компликации од овие закони што може негативно да влијаат на енергетиката.
И законот за игри на среќа кој претходно беше донесен, но претседателот Стево Пендаровски не го потпиша, повторно влезе во собраниска процедура.
