– Враќање на холандските туристи во Струга и поддршка на децата со посебни потреби биле фокус на разговорите меѓу градоначалникот на Општина Струга, Менди Ќура и македонската амбасадорка во Хаг, Линда Салиeска.
Општина Струга соопшти дека за време на претстојот во Холандија, градоначалникот, придружуван од основачот на Фондацијата CDFK Струга, Ергин Борова, со амбасадорката разговарале за можностите за зајакнување на соработката и промоција на Струга во Холандија.
– Во фокусот на разговорите беа враќање на Струга во фокусот на холандските туристи, преку разгледување нови можности за промоција на туристичките потенцијали на градот и регионот на Охридското Езеро, како и воспоставување поодржливи врски со холандски тур-оператори и туристички партнери, како и поддршка за децата со посебни потреби, преку размена на искуства и добри практики од Холандија, како и можности холандските програми и политики да придонесат во развојот на Дневниот центар за деца со посебни потреби во Струга, стои во информацијата.
Средбата, како што е наведено, била добра можност да се разговара за конкретни чекори кон воспоставување нови партнерства и соработки, со цел развој на туризмот, унапредување на социјалната инклузија и подобрување на услугите за граѓаните на Струга.
