192 примероци вода од 48 мерни места низ Скопје покажуваат дека водата за пиење во главниот град е целосно безбедна. Мерењата уследат по предупредувањата од биолозите дека депонијата кај „Југохром“ ја загадува водата за пиење. Депонијата со јаловина од хром, преку подземните води, е закана и за главниот извор Рашче, од каде скопјани добиваат вода- предупредуваа биолозите. Но, мерењата покажуваат дека простор за паника нема. Сите примероци земени во периодот од 9ти до 13ти март се испитани преку физичко-хемиска и микробиолошка анализа.
„Согласно добиените резултати од испитувањата, сите примероци ОДГОВАРААТ на Правилникот за барања за безбедност и квалитет на водата за пиење.“- велат од ЈП „Водовод и канализација“.
Дополнително од претпријатието нагласуваат дека природниот извор Рашче, останува ресурс со непроценлива вредност за Скопје.
Сепак, експертите не сметаат дека ризиците треба да се исклучат. Биологот Ана Чоловиќ Лешоска вели дека доколку дојде до загадување со шестовалентен хром, водата од Рашче не би можела да се користи ниту како техничка, што би значело трајна загуба на клучниот воден ресурс за главниот град. Апелот до Министерството за животна средина е да се донесе конкретна одлука за справување со депонијата, за трајно да се исчезне ризикот од загадување на изворот за вода од кој зависи целиот град.
