Нивната храброст стана наш темел, наш код на честа и заклетва по која живееме и работиме – рече потполковник Сашко Палевски, командант на прилепскиот гарнизон „Мирче Ацев“ на одбележувањето на 25- годишнината од загинувањето на десетте прилепски бранители кај Карпалак во кругот на касарната.
Бројни делегации, од касарната, од Општината, од роднините на загинатите, од здруженијата, партии и граѓани, положија свежи цвеќиња и се поколонија пред спомен обележјето во дворот на Касарната од каде воениот конвој на 8 август 2001-та тргна кон Тетово. Кај месноста Карпалак на патот Скопје-Тетово во заседа на конвојот беа убиени десетте воени резервисти, прилепските бранители.
-Поминаа точно 25 години откако Нане, Сашо, Веби, Бранко, Горан, Ердован, Дарко, Љубе, Пецо и Марко заминаа во вечноста. Времето неминовно си го прави своето, но во нашата единица, споменот за нив не бледнее. Во стројот каде тие некогаш стоеја, нивниот дух е секогаш присутен. Нивната храброст стана наш темел, наш код на честа и заклетва по која живееме и работиме. Тие за нас не се минато, тие се нашиот секојдневен патоказ и поради тоа, споменот за нив е сѐ посилен – рече командантот на гарнизонот „Мирче Ацев“, потполковник Сашко Палевски, во обраќањето пред присутните.
Од здружението „Карпалак“ велат дека по 25 години освен поради болката и тагата, во касарната се да се потсетат на жртвата што ја дадоа соборците – прилепските бранители, застанувајќи на браникот на државата. Спомен-бисти за нив не се доволни.
-Тука сме за да ја оддадеме честа и да ги поттикнеме идните генерации да не се случуваат вакви злодела. Може и повеќе да бидат испочитувани, а ние се трудиме да се остави трага за нив, да бидат запишани во историјата, како и нашите борци од 1903-тата и од 1941-та. Спомен-бисти не се доволни, на местата каде се загинати немаат спомен обележја и треба многу повеќе да се направи – изјави Игор Петрески, претседател на здружението „Карпалак“.
Беше посетена и спомен собата во Касарната каде се фотографиите и спомените за загинатите. Најавено е дека секој од 10-те бранители ќе добие посебна витрина каде, освен фотографијата, ќе бидат изложени и лични предмети за што се повикани блиските да приложат лични обележја од секој од десетте загинати прилепски бранители.
Вечерва е посетено и спомен обележјето во прилепското село Лениште, а во манастирот „Света Петка“ во селото се служеше богослужба.
Централното чествување е утре, од 13 часот пред споменичниот комплекс во центарот на Прилеп.
Изутрината, делегации ќе ја посетат месноста Карпалак на патот Скопје – Тетово, ќе бидат посетени вечните почивалишта на загинатите во Прилеп и во населените места, а панихида во нивни спомен ќе се одржи во црквата „Св. Петка“ во прилепската населба Точила.
