Отсекот за превенција при СВР Куманово, во соработка со Општинскиот совет за превенција, денеска реализираше превентивна кампања „Безбедно на мотор и тротинет – Носи кацига“, насочена кон зголемување на безбедноста на возачите на мотоцикли, велосипеди со помошен мотор и електрични тротинети. Во рамки на кампањата, на учесниците во сообраќајот им беше укажано на значењето од користењето заштитна кацига како најважен начин за намалување на ризикот од тешки повреди при сообраќајни незгоди.
Од Општина Куманово информираат дека активноста имала за цел да ја подигне јавната свест за одговорното учество во сообраќајот и да потсети дека носењето кацига не е само законска обврска, туку и клучен елемент за личната безбедност. Воедно, до возачите беше упатен апел доследно да ги почитуваат сообраќајните правила и прописи, како и законската одредба според која со лесно електрично возило може да управува лице кое има наполнети 18 години.
Од Општината посочуваат дека преку вакви превентивни активности, во соработка со СВР Куманово, продолжуваат да работат на подигнување на јавната свест и унапредување на безбедноста на сите учесници во сообраќајот.
