До Општина Куманово поднесени се 160 барања и известувања од граѓани и правни субјекти за надомест на штети предизвикани од невремето што го зафати градот на 20 јули, информираа денеска од Општината. Оттаму соопштија дека најголемиот дел од пријавите се однесуваат на оштетени фасади, откорнати кровни конструкции на семејни куќи и станбени згради, оштетувања на покриви, како и штети на возила предизвикани од откорнати делови од кровови и паднати дрвја. Пријавени се и штети од поплавување со атмосферски води кои навлегле во објекти од улици и тротоари, како и оштетувања на земјоделски насади.
Од локалната самоуправа потсетија дека рокот за поднесување барања за обесштетување истече на 31 јули, согласно одлуката на Комисијата донесена по невремето од 20 јули. Согласно законската регулатива, од Општината потенцираат дека сопствениците на објектите имаат обврска преку тековно и инвестициско одржување да ги обезбедат основните барања за безбедност и функционалност на градбите. Комисијата за проценка и утврдување на висината на штета од природни непогоди и други несреќи на подрачјето на Општина Куманово досега одржала два состанока, на кои биле разгледани сите пристигнати барања.
По извршениот увид на терен и проценката на висината на штетите, Комисијата ќе изготви елаборат-извештај, кој ќе биде доставен до надлежната комисија формирана од Владата за понатамошно постапување.
