Владата посветено и неуморно работи во интерес на граѓаните и државата, велат од ВМРО ДПМНЕ.
Се преземаат мерки и активности за подобрување на животниот стандард на граѓаните, за раст и развој на економијата, за враќање на функционалноста на институциите и за активна борба против криминалот и корупцијата.
Владата води државничка политика насочена кон зачувување на националните интереси и достоинствено претставување на државата на меѓународната сцена, со целосно зачуван национален идентитет и интегритет.
Според соопштението, овие напори се препознаени, поддржани и поздравени од страна на граѓаните, што го потврдува и најновото истражување на јавното мислење, спроведено од агенцијата „Маркет Вижн“ во периодот од 20 март до 17 април, на репрезентативен примерок од 1.200 испитаници.
Анкетата покажала дека ВМРО-ДПМНЕ и нејзиниот претседател и премиер, Христијан Мицкоски, уживаат убедливо водство и висока доверба меѓу граѓаните. На Мицкоски му веруваат 25,4% од анкетираните, додека на Венко Филипче само 3,8%.
На прашањето за кого би гласале доколку утре се одржат избори, 51,7% од испитаниците изјавиле дека би гласале за ВМРО-ДПМНЕ, а 64,4% од граѓаните рекле дека сигурно би излегле на гласање.
Од ВМРО-ДПМНЕ истакнуваат дека, за прв пат после многу години, граѓаните гледаат вистинска борба против криминалот и корупцијата, што се потврдува со големиот број полициски акции спроведени во изминатиот период. Анкетата покажала дека криминалот и корупцијата веќе не се перцепираат како најголем проблем во државата.
Како што велат од партијата, тоа е резултат на чесното работење на власта, која доследно го применува законот и обезбедува еднаков третман за сите. Претходните кривични дела се процесуираат, а сторителите се соочуваат со одговорност пред надлежните институции.
„Овие резултати се потврда за досегашната работа, но и дополнителна обврска за ВМРО-ДПМНЕ и Христијан Мицкоски уште поенергично и посветено да работат на исполнување на дадените ветувања за подобар животен стандард, раст на економијата и продолжување на борбата против криминалот и корупцијата“, се вели во соопштението на владејачката партија.
